Viðræðunefnd SÍ og samninganefnd Sambands íslenskra sveitarfélaga hittist á fyrsta samninganefndarfundi mánudaginn 16. desember. Farið var yfir markmið SÍ í kjaramálum og viðræðunefndin lagði áherslu á að gerð yrði verkáætlun til lengri tíma um þau markmið sem við höfum lagt fram óháð lengd kjarasamnings sem gerður yrði núna. Fram kom í máli samninganefndar Sambandsins að ekki yrði farið í viðræður fyrr en niðurstaða lægi fyrir í kjarasamningum á almennum markaði. Næsti fundur var þó ákveðinn 14. janúar 2014.

Hvernig mælum við skólastarf? Hér á landi mælum við eða metum skólastarf með nokkrum aðferðum má þar meðal annars nefna samræmd próf, leskimanir, talnalykil, ytra mat og sjálfsmat skóla. Niðurstöður PISA rannsóknarinnar 2012 eru ein af nokkrum mælieiningum sem gefa okkur vísbendingar um stöðu skólamála hér á landi.

Alþjóðakennarasamtökin (Education International) hafa meðal annars gagnrýnt að PISA rannsóknin „nái aðeins til þrenns konar læsis; talna, lesmáls og raungreina og þótt þessir þættir séu mikilvægir geta þeir ekki nýst sem mat á öllu því sem kennt er í skólum. Listgreinar, tungumál og hugvísindi eru aðeins nokkur af þeim viðfangsefnum sem rannsóknin nær ekki til."

Þeir benda einnig á að „PISA geti ekki verið endanlegur vitnisburður um gæði menntakerfis, samt þarf að huga vel að breytingum sem verða á heildarárangri nemenda og hreyfingum milli efri og neðri hópa í hverju landi fyrir sig. Grannskoðun á þróun mála milli PISA umferða í hverju landi fyrir sig er hugsanlega gagnlegri en samanburður milli landa.“

„PISA rannsóknin 2012 sýnir að jafnari úthlutun bjarga til skóla, minni aðgreining nemenda vegna félagsaðstæðna og efnahags, meira sjálfræði skóla hvað varðar námskrá og kennsluaðferðir og, það sem mestu varðar, framboð á menntuðum kennurum styður jákvætt námsumhverfi og bætir námsárangur.“

Það er mjög gott að „OECD hafi komist að því að góð kjör kennara hafi bein áhrif á frammistöðu nemenda. Fámennari hópar og vel launaðir kennarar eru tveir grunnþættir góðra menntakerfa. Lönd sem hafa bætt árangur sinn verulega á síðustu tíu árum hafa tekið þá stefnu að bæta störf kennara með aukinni fagmennsku, með hækkun kennaralauna til að gera starfið áhugaverðara fyrir nýliða og með hvata fyrir kennara til að taka þátt í starfsþróun,“ er meðal þess sem kemur fram í fyrstu viðbrögðum Alþjóðakennarasamtakanna (EI).

Meginatriðið hér er að hver skóli taki allar þessar mælingar og mat, ígrundi niðurstöður og skoði hvernig nemendur hans eða skólinn í heild er að ná árangri í námi, líðan og framförum. Umbætur og skólaþróun byggjast fyrst og fremst á markvissu sjálfsmati skóla.