Aðalfundur félagsins var haldinn í Laugalækjarskóla laugardaginn 12 október. Rúmlega 70 félagsmenn sóttu fundinn. Auk hefðbundinna aðalfundarstarfa var Oddur Jakobsson með erindi um kjaramál og stöðuna í dag. Tillaga frá uppstillinganefnd um fulltrúa í stjórn og trúnaðarstörf var samþykkt samhljóða.

Samþykkt var tillaga um að setja á stofn laganefnd SÍ sem færi í að endurskoða lög félagsins ef það verða breytingar á lögum Kennarasambandsins á þingi þess 1.-4. apríl 2014. í þeirri tillögu er einnig heimild til stjórnar um að vera með aukaaðalfund SÍ haustið 2014 um lagabreytingar ef þess gerist þörf.

Starfsnefndir aðalfundar ræddu og tóku afstöðu til framtíðarsýnar og stefnu SÍ í félags- fag- og kjaramálum. Samþykktar voru tvær ályktanir um kjaramál og tvær ályktanir um skólamál. Auk þess vísaði kjaranefnd ábendingum um samstarf SÍ og FSL og samrekstur til samninganefndar.

Fundargerð aðalfundar verður birt síðar á heimasíðu félagsins.

Ályktun um frestun á gildistöku námsmats skv. nýrri aðalnámskrá

Aðalfundur Skólastjórafélags Íslands, haldinn í Laugalækjarskóla 12. október 2013 fagnar útkomu nýrrar Aðalnámskrár grunnskóla og bindur vonir við að hún bæti og efli starf í grunnskólum landsins. Námskráin gefur einstökum skólum gott svigrúm til að móta eigin nálganir og áherslur og er það vel en ákeðið samræmi er nauðsynlegt. Sú breyting að leggja áherslu á hæfni nemenda er ennfremur þarft og jákvætt skref. Eigi þessar áherslubreytingar að verða skólastarfi til framdráttar er brýnt að tryggja víðtækan sameiginlegan skilning á þeim meðal skólafólks. Til að svo megi verða er nauðsynlegt að kveða skýrar að orði í sumum tilfellum. Sérstaklega á það við um hvernig staðið skuli að einkunnagjöf á grunni hæfniviðmiða svo tryggt verði ásættanlegt samræmi á milli skóla, einkum undir lok grunnskóla. Verði það ekki gert er einsýnt að upp komi fleiri álitamál varðandi jafnræði milli nemenda en nú er.

Því skorar fundurinn á menntamálaráðherra að taka þegar í stað ákvörðun um að fresta um eitt ár gildistöku þeirra ákvæða Aðalnámskrár grunnskóla sem kveða á um nýtt námsmatskerfi og matsviðmið við lok grunnskóla. Jafnframt skorar fundurinn á ráðherra að láta hefja vinnu við endurskoðun þessara þátta með það að markmiði að skilgreina með miklu skýrari hætti en nú liggur fyrir muninn á þeirri hæfni sem krafist er fyrir matsviðmiðin þrjú, A, B og C .
Skólastjórafélag Íslands óskar eindregið eftir að fá að koma að þeirri vinnu.

Ályktun um ytra mat og mikilvægi þess fyrir skólaþróun

Lög um grunnskóla 2008/91. 37. og 38 grein kveða á um ytra mat menntamálaráðuneytis og sveitarfélaga. Aðalfundur Skólastjórafélags Íslands haldinn í Laugalækjarskóla 12. október 2013 hvetur sveitarstjórnir og menntamálayfirvöld til að standa faglega að ytra mati á skólastofnunum.Tryggja þarf að ytra og innra mat á skólum hafi það að leiðarljósi að vera fagfólki í skólum til leiðsagnar og umbóta eins og grunnskólalög hveða á um. Dæmin sýna að niðurstöður ytra mats eru vandmeðfarnar og tilgangur þeirra getur snúist upp í andhverfu sína.

Fundurinn hvetur mennta- og menningarmálaráðuneytið til að tryggja fjárveitingar til matsstarfa og að þau matsstörf séu unnin af fagfólki í samvinnu við starfsfólk skólanna. Þannig ná lögin tilgangi sínum.