Viðræðuáætlun og upphaf samningaviðræðna

Formenn Félags framhaldsskólakennara og Félags stjórnenda í framhaldsskólum undirrituðu viðræðuáætlun við samninganefnd ríkisins vegna endurnýjunar kjarasamninga 22. nóvember sl. Fyrsti samningafundur með ríkinu verður haldinn 3. desember og þar á að ræða nánar skipulag og efni viðræðna. Eins og kunnugt er rennur kjarasamningurinn út 31. janúar 2014 og lögum samkvæmt ber að leitast við að ljúka kjarasamningagerð áður en gildandi samningur rennur út. Það markmið er því sett fram í 1. grein viðræðuáætlunarinnar. Viðræðuáætlunina má nálgast hér.

Flensborg

Á dögunum bárust þau vondu tíðindi úr Flensborg að vegna fjárhagsvanda skólans þyrfti að leggja niður fjölmiðladeildina og alla kennslu í matreiðslu og myndlist. Þetta felur í sér að allt verklegt nám í skólanum hverfur, kennarar missa vinnuna og nemendur verða fyrir miklum óþægindum. Fjölmiðladeildin var stofnuð fyrir 13 árum og þar hefur verið unnið merkilegt brautryðjendastarf sem vakið hefur mikla athygli langt út fyrir skólann. FF hefur átt mikið og gott samstarf við deildina á síðustu misserum um myndbandagerð um „Kennara mánaðarins“, og þakkar fyrir það.

Þessi alvarlega staða í Flensborg varpar ljósi á þær miklu skekkjur sem hafa verið árum saman í forsendum menntamálaráðuneytis fyrir rekstarfé til skólanna vegna aukins nemendafjölda, fleiri verkefna og launakostnaðar þeirra. Fram kom í viðtali við skólameistara Flensborgar að ákvörðunin um niðurlagningu námsins byggðist ekki síst á því að fámennir hópar væru í fjölmiðladeildinni og kennslan væri dýr. Afleiðingar stefnu stjórnvalda gagnvart skólunum eru að hrúga nemendum í bóklegar greinar með sem minnstum tilkostnaði. Ekkert er að marka allt talið um mikilvægi verklegs náms.

Á fundi bæjarstjórnar Hafnarfjarðar þann 27. nóvemer síðastliðinn var niðurskurðinum mótmælt harðlega og skorað á mennta- og menningarmálaráðherra að endurskoða fjárframlög. Ályktunina í heild má lesa hér:

Átján framhaldsskólar hafa lagt til Vikupóstsritara frá ársbyrjun 2013

Nú er um að gera fyrir hina fjórtán að slást í hópinn. Gaman er að segja frá því að rúmlega þrjátíu kennarar og skólastjórnendur úr 18 skólum hafa nú þegar skrifað Vikupósta sem birtir eru á heimasíðu Félags framhaldsskólakennara og miðlað áfram á samfélagsmiðla. Mest hafa borist fjórir Vikupistlar úr sama skóla og eru það FB, MH, MS og Kvennaskólinn sem hafa vinninginn en aðrir skólar sem eiga pistlahöfunda eru FÁ, FG, Flensborg. F.Mos, FS, FSH, FSu., FVA, MA, MH, MK, TÍ, VA og VÍ. Við hvetjum nú félagsfólk okkar í skólunum fjórtán á höfuðborgarsvæðinu, í Borgarnesi, á Ísafirði, Sauðárkróki, Akureyri, Laugum, Egilsstöðum, Höfn og í Vestmannaeyjum sem ekki hafa enn blandað sér í Vikupóstsritun að drífa í að senda okkur Vikupistla á næstunni. Loks má geta þess að kynjaskipting er nær alveg jöfn það sem af er og er það vel en til þess að sjónarmiða um kennslu, skólastjórnun og náms- og starfsráðgjöf sjái stað á þessum vettvangi þurfa náms- og starfsráðgjafar að blanda sér í vikupóstsritun. Áskorun til þeirra er hér með komið á framfæri.