Orð Illuga
Illugi Gunnarsson tók við embætti mennta-og menningarmálaráðherra þann 23. maí síðastliðinn. Fram til þessa hefur hans helsta innlegg til menntamála verið að boða styttingu framhaldsskólans. Hann segist hafa tekið ákvörðun um að koma þessu máli í gegn, hefur kynnt hugmyndir sínar á ríkisstjórnarfundi og segir að starfshópar í menntamálaráðuneyti útfæri þær nú. Að öðru leyti hefur hann lítið tjáð sig um framhaldsskólastigið.
Helsti rökstuðningur Illuga er að Ísland sé eina landið innan OECD þar sem taki 14 ár að ljúka námi til stúdentsprófs. Illugi sækir stuðning í hugmyndir Alþjóðagjaldeyrissjóðsins um niðurskurð í menntakerfinu og leggst á sveif með forsvarsmönnum atvinnulífsins sem vilja stytta námstíma til að draga úr kostnaði.
Félagi framhaldsskólakennara þykir þetta vera fremur metnaðarlaus stefna að hirða ekki um innihald menntunarinnar heldur einblína á að skera niður menntun til að spara ríkisútgjöld. Rétt er að benda á að árlegur heildarkostnaður á hvern framhaldsskólanema á Íslandi er langt undir meðaltali landa OECD, einnig hlutfall kennaralauna af íslenskri þjóðarframleiðslu á mann miðað við flest önnur ríki OECD. Það er sorglegt til þess að vita að Illugi sem gefur sig út fyrir að hafa mikinn áhuga á menntamálum sem hann kallaði í aðdraganda kosninganna „fjöregg þjóðarinnar“ hafi ekki betra til málanna að leggja en þetta eftir að skorið hefur verið markvisst niður til málflokksins frá því löngu fyrir kreppu og sá niðurskurður nú talinn nema tæpum 12 milljörðum á síðustu fjórum til fimm árum.
