Heilir og sælir ágætu félagsmenn, starfsþróun skólastjórnenda er afar mikilvæg fyrir alla skólaþróun og umbætur í skólum. Hér á landi er hún einkum í formi formlegs náms í meistaranámi og námskeiða sem einstök sveitarfélög eða fagfélög skipuleggja eftir aðstæðum hverju sinni. Sum sveitarfélög standa vel að starfsþróun sinna skólastjórnenda en önnur síður og þar skiptir eflaust stærð sveitarfélaga máli. Þá hafa svæðafélög skólastjórnenda sinnt þessum þætti með málþingum og námskeiðum.

Hér þurfum við þó að gera betur og því hefur SÍ beitt sér fyrir því að vera í samstarfi bæði við stjórnendafélögin innan KÍ og Samband íslenskra sveitarfélaga um að efla og þróa starfsþróun skólastjórnenda. Það er von okkar að með þessu samstarfi geti skólastjórnendur átt kost á fjölbreyttri símenntun og með því sinnt starfsþróun sinni betur.

Næsta vetur munu Menntavísindasvið Háskóla Íslands, Opni háskólinn í Reykjavík og Skólaþróunarmiðstöð Háskólans á Akureyri bjóða upp á námskeið fyrir skólastjórnendur, sjá frekar hér fyrir neðan.

Einnig er fyrirhugað að vera með námskeiðsdag fyrir nýja skólastjórnendur og námskeið um starfsmannamál, nánar auglýst síðar. Við vonum að skólastjórnendur nýti sér þessi tilboð þannig að hægt sé að efla enn frekar faglega starfsþróun stjórnenda.

Námstefna SÍ verður að þessu sinni haldin í samvinnu við Félag stjórnenda leikskóla. Námstefnan mun fjalla um Skóla framtíðarinnar og hvernig við sem skólastjórnendur þurfum að vera horfa fram á veginn og hafa sýn til framtíðar. Hvernig byggjum við upp nám og kennslu á 21. öldinni? Hvaða verkefni eru handan við hornið og hvernig vinnum við þau? Námstefna verður haldin á Hótel Hilton föstudaginn 11. október kl. 9:30-16:30. Tveir erlendir fyrirlesarar Frank Craword og Ollie Bray munu vera með erindi um stjórnandann sem leiðtoga í skóla framtíðarinnar. Nánari dagskrá verður birt í ágúst og þá opnað fyrir skráningu.

Aðalfundur verður haldin í Laugalækjarskóla, Reykjavík laugardaginn 12. október. Þar sem um er að ræða aðalfund er rétt að ítreka að samkvæmt 19. gr. laga félagsins þurfa tillögur að lagabreytingum að hafa borist stjórn 6 vikum fyrir aðalfund. Dagskrá fundarins og nánari upplýsingar verða send út í ágúst,