Kæru félagsmenn
Fréttabréf Félags framhaldsskólakennara birtist hér í fyrsta sinn með nýju sniði. Vonandi mælist breytingin vel fyrir.
Kennarar og hjúkrunarfræðingar verr launaðir en viðmiðunarstéttir
Ríkisútvarpið flutti frétt 7. desember sl. um launamál hjúkrunarfræðinga, félagsmanna KÍ í framhaldsskólum og félagsmanna BHM. Sjá hér.
Tölur um launamun sem nemur 60 þúsund krónum á mánuði eru kunnuglegar fyrir félagsmenn FF en tímabært að fjölmiðlar veki athygli á lakari kjörum lykilstarfsmanna í velferðarkerfinu en samanburðarhópa. Hjúkrunarfræðingar og kennarar eiga auk þess sameiginlegt að starfa í stofnunum sem glíma við langvarandi og alvarlegan niðurskurð í rekstri samhliða stöðugri fjölgun skjólstæðinga sem eru sjúklingar og nemendur
Niðurskurður framhaldsskóla miklu meiri en stjórnvöld láta í veðri vaka
Milli áranna 2007 og 2011 fjölgaði nemendum í framhaldsskólum um rúmlega eitt þúsund eða tæp 6% auk þess sem nemendum fjölgaði um önnur fimmtán hundruð haustið 2011 vegna átaksins Nám er vinnandi vegur. Niðurskurður á rekstrafé framhaldsskólanna var á sama tíma rúmlega 18% og voru útgjöldin t.d. árið 2008 að raunvirði 12% undir OECD meðaltali. Harkalegur niðurskurður eftir hrunið hefur því aukið vanda sem fyrir var. Uppsafnaður niðurskurður er rúmlega 4 milljarðar 2009-13 eða rúmlega 18% á verðlagi 2013. Stjórnvöld varpa ryki í augu almennings þegar þau fullyrða að framhaldsskólum sé hlíft frekar en öðrum ríkisstofnunum við niðurskurði. En taka verður tillit til óhóflegrar fjölgunar í nemendahópum sem er alvarleg birtingarmynd niðurskurðarins.
Sjá grein formanns og varaformanns FF hér.
Greinum á milli viðfangsefna kjarasamninga og faglegra mála
Stjórn FF hefur nýlega sent félagsdeildum sínum í framhaldsskólum stöðumat stjórnar og samninganefndar á samningamálum og áætlun um vinnu í kjaramálum næstu mánuðina.
Stjórnin dregur meðal annars þann lærdóm af skipbroti samkomulags við ríkið frá 24. október síðastliðinn að skýrari línur þurfi að draga milli kjarasamningsviðfangsefna og þátttöku í framkvæmd menntastefnu og laga. Samkomulagið átti að samþætta endurskoðun og endurskilgreiningu faglegra þátta og kjara og það gekk ekki upp. Meginástæðan er þó sú að ríkisvaldið reiddi ekki fram fjármuni í neinu samræmi við efni samkomulagsins. Sú aðferð að efna til víðtæks samstarfs við ríkisvaldið um kennarastarfið og kennarakjörin í ljósi nýrra laga og breytts skólastarfs hefur að mati stjórnarinnar beðið hnekki. Samkomulagið við menntamálaráðherra veslaðist upp í meðförum ríkisvaldsins sem veitti málefnum þess ekki brautargengi í fjárlagagerðinni.
Ósk um almennan félagsfund FF
Nýlega barst beiðni til stjórnar FF frá BHS, TS, FSU, IH, MK, MR um almennan félagsfund með tilvísun til 11. gr. félagslaga um stöðuna í samningamálum og önnur mál er lúta að starfsemi FF. Stjórnin verður að sjálfsögðu við þessu og hafði þegar ákveðið að halda almenna fundi um þessi mál á næstu önn. Stjórnin hefur óskað eftir fundi með fundarbeiðendum um dagskrá og fundartíma. Nánari grein verður gerð fyrir fundinum eftir jólaleyfi á heimasíðu og í Fréttabréfi FF.
Átak í útgáfu- og kynningarmálum
Félagið setti á stefnuskrá sína á aðalfundi FF vorið 2011 að efla kynningarstarf á vegum félagsins um kennarastarfið og starf framhaldsskóla. Kynninganefnd var í framhaldi af því skipuð í nóvember 2012. Í henni sitja Elna Katrín Jónsdóttir, Hrafnkell Tumi Kolbeinsson, Ármann Halldórsson og Anna María Gunnarsdóttir. Nefndin sem hefur margt nýtt á prjónunum nýtur liðsinnis starfsfólks á útgáfu- og kynningarsviði KÍ. Stofnuð hefur verið fasbókarsíða FF. Strax á nýja árinu gengur heimasíða félagsins í endurnýjun lífdaga með nokkrum föstum nýjum efnisþáttum s.s. mánaðarlegu myndskeiði um ,,Kennara mánaðarins“ og ,,Vikupóstinum“ en í báðum tilvikum verður leitað til félagsmanna vítt og breitt um landið og í sem flestum skólum um efni, skoðanir og sjónarhorn á kennarastarfið, kjaramálin og skólamálin. Frekar verður fjallað um málin eftir því sem breytingarstarfinu vindur fram.
Tilkynning til félagsdeilda
Frjárframlög til félagsdeilda FF hafa nú verið greidd eins og undanfarin ár. Tilgangurinn er að styðja við félagsstarf í deildum, störf trúnaðarmanna og formanna.
Stjórn og starfsfólk Félags framhaldsskólakennara óska félagsmönnum gleðilegra jóla, ánægjulegs jólaleyfis og heillaríks komandi árs.
Ritstjórar: Anna María Gunnarsdóttir og Elna Katrín Jónsdóttir
Ábyrgðarmaður: Aðalheiður Steingrímsdóttir