Í þessum hluta fréttabréfsins er ætlunin að kynna eina konu í hverju bréfi. Sú sem ríður á vaðið er Björg Sigurvinsdóttir.
Ætt og uppruni: Ég er fædd á Akureyri í desember 1961. Ég kom aðeins fyrr í heiminn en áætlað var svo koma mín truflaði jólabakstur mömmu minnar og fjölskyldan fékk eitthvað færri sortir þessi jólin en áður. Ég er næstyngst fimm systkina, við erum fjórar systur og einn bróðir sem er yngstur. Ég hef alla tíð átt heima á Akureyri utan sjö námsára þegar ég bjó í Reykjavík.
Segja má að rætur mínar liggi víða utan Akureyrar: pabbi minn, Sigurvin Jónsson, er úr Glæsibæjarhepp í Eyjafjarðarsveit og Tréstöðum í Hörgárdal og mamma mín Guðrún B. Hafliðadóttir, var uppalin á Akranesi. Hún vann sem húsfreyja, verkakona og seinustu ár starfsævinnar sem skólaliði í Lundarskóla.
Pabbi minn starfaði sem vörubílstjóri en seinni ár var hann umsjónarmaður í Lundarskóla.
Ég er gift Stefáni Þór Sæmundssyni og eigum við tvö börn og eina yndislega 4 ára ömmustelpu.
Menntun: Fósturskóli Íslands 1983.
B.Ed- gráða sérskipulagt nám fyrir leikskólakennara Háskólinn á Akureyri 2000.
Framhaldsnám í stjórnun diplóma, Háskólinn á Akureyri 2001.
Meistaragráða í menntunarfræðum með áherslu á stjórnun, Háskólinn á Akureyri 2007.
Starf: Allan minn starfsferil hef ég unnið störf tengd leikskólum, langlengst í stjórnunarstörfum. Núverandi starf er leikskólastjóri Lundarsels.
Það skemmtilegasta við starfið: Vera með og umgangast samstarfsmenn, börn, foreldra. Hafa áhrif á uppeldi barna og vera faglegur stjórnandi/leiðtogi í starfinu.
Áherslur í starfi: Ég hef ávallt lagt áherslu á lýðræði í starfi mínu, starfsmenn taka þátt í ákvörðunum um starfið. Með foreldraráði hafa foreldrar einnig tekið meira þátt í sambandi við það sem viðkemur starfinu og nú er ég að leita fleiri leiða til að börnin verði enn virkari þátttakendur. Helstu lífsgildin mín eru traust, virðing og vellíðan, þau endurspegla áherslur mínar í starfinu. Ég legg einnig upp úr því að leikskólinn sé lærdómssamfélag, þar sem allir læra, börn jafnt sem fullorðnir með því að rannsaka og ígrunda lífið og tilveruna.
Af hverju DKG?: Ég vissi ekkert um tilvist DKG þegar hringt var í mig og mér boðið að vera einn af stofnendum Mýdeildar, sem ég þáði. Það hefur verið mjög skemmtilegt og fróðlegt að vera í þessum félagsskap og ég sé ekki eftir að hafa tekið þátt. Gefur mikið að vera með konum með fræði sem bakgrunn, kynnist fleirum konum og fæ víðari sýn á veröldina.
Hvaða spurningu viltu leggja fyrir næstu konu? Hver eru helstu áhugamál þín?