Að þessu sinni er það Birna Guðrún Baldursdóttir sem segir okkur frá sjálfri sér.
Ætt og uppruni: Ég er fædd og uppalin á Eyjardalsá í Bárðardal, dóttir hjónanna Baldurs Vagnssonar og Sæunnar Gestsdóttur. Ég er þriðja í systkinaröðinni af 6 systkinum, tvö yngstu eru reyndar næstum því eins og börnin mín en þau eru það mikið yngri. Ég gekk í Barnaskóla Bárðdælinga, þar sem nú er Kiðagil í 1.-6. bekk og var í heimavist frá fyrsta degi. Þó það hljómi illa þá á ég margar mjög góðar minningar úr skólanum og margt sem við lærðum sem var kannski ekkert sjálfsagt eins og að dansa gömlu dansana, undibúa leikrit, syngja, spila á hljóðfæri og margt fleira spennandi. Í 7. bekk fluttist ég í Stóru Tjarnarskóla en síðan var ferðinni haldið áfram inn á Akureyri í VMA. Þar byrjaði ég á heilbrigðisbraut og útskrifaðist bæði sem stúdent og sjúkraliði.
Ég er gift Rögnvaldi Braga Rögnvaldssyni en ég kynntist honum ung, sá strax að hann var góður kostur og hef haldið fast í hann síðan. Við prófuðum að búa í Danmörku og Reykjavík en til mikillar lukkur fyrir okkur var Iðjuþjálfanámið aðeins kennt hér og það dró okkur aftur heim. Ég á með honum þrjá yndislega drengi, Rökkva 16 ára, Kormák 10 ára og Styrmir rekur lestina 6 ára. Það er óhætt að segja að það sé oft fjör en mér finnst fjölskyldulífið oftast ótrúlega skemmtilegt og finnst ég mjög lukkuleg kona í lífinu. Ég elska að hafa gaman, búa til ævintýri stór og smá. Ég er andlega þenkjandi, elska jóga, alla útiveru og hreyfingu – hef gaman af því að skapa s.s. sauma, taka ljósmyndir og margt fleira. Það er eiginlega það flókna í lífinu að koma öllu þessu skemmtilega fyrir inn í 24 stunda sólarhring.
Menntun: Eftir að hafa unnið sem sjúkraliði í nokkur ár skellti ég mér í nám í iðjuþjálfun við Háskólann á Akureyri, ég er sannfærð um að það er ein besta ákvörðun sem ég hef tekið í lífinu. Þessi fjögur ár þroskuðu mig ótrúlega mikið auk þess að ég eignaðist frábæra vini sem ég veit að eiga eftir að fylgja mér út allt lífið, á einmitt 10 ára útskriftarafmæli í sumar og það er strax búið að skipuleggja hitting.
Starf: Ég starfa sem iðjuþjálfi við Glerárskóla og hef verið þar síðan 2005 og er í 75% vinnu einnig hef ég umsjón með klúbbum f. einhverfa, bæði ungmenni og fullorðna í samvinnu við Einhverfusamtökin.
Það skemmtilegasta við starfið: Börnin – að vera með skemmtilegum krökkum sem eru að gera flotta hluti er ómetanlegt, hjálpa þeim að þroska hæfileika sína og finna leiðir í lífinu. Síðan er fjölbreytileikinn, enginn vetur er eins og sennilega frelsið sem ég hef en ég hef fengið að móta starfið mitt og reyni að nýta mína hæfileika mína til fulls. Eins má ekki gleyma góðum starfsmannahóp í Glerárskóla, líflegt félagslíf ásamt gleði og hlátri á kaffistofunni sem mér finnst mjög mikilvægt.
Áherslur í starfi: Fjölskyldumiðuð nálgun og teymisvinna, s.s. að hafa fjölskylduna, foreldrana og umsjónakennarann sem mest með í ráðum og allir séu að vinna að sama markinu. Eins að nýta áhugahvötina til að efla nemendur og reyna að finna nýjar leiðir þegar þessar gömlu eru ekki að virka. Reyna að festast ekki í einhverjum fyrirframákveðnum kassa og komast ekki lönd né strönd!
Af hverju DKG?: Er mjög forvitinn kona og hef ótrúlega gaman að samskiptum við annað fólk, hef tekið þátt í mörgum svona hópnum og fannst þetta áhugaverður hópur að prófa. Ég hef líka alltaf gaman að heyra um nýjar leiðir og hugmyndir til að efla mig almennt í starfi. Eins hef ég mikinn áhuga á uppbyggjandi samveru og mér finnast þessir fundir einkennast af því, oft fer ég dauðþreytt en kem endurnærð til baka.
Spurning frá Þórgunni, hvaða drauma um framtíðina hafðir þú sem barn?: Ég ætlaði að hjálpa öðrum, vera læknir og eignast mann og börn, það eru einmitt til skemmtilegar myndir af því þegar ég var búinn að drösla nýfæddum bróður mínum milli herbergja til að „lækna“ hann með nýja læknisdótinu mínu – aðeins 3.ára. Eins var alltaf ríkt í mér sem barni að ég myndi eignast mína eigin fjölskyldu. Ég hafði líka mikinn áhuga á fjölmiðlum og leiklist. Fór í starfsnám á Dag og var ákveðinn í því að verða blaðamaður á unglingsárunum, hver veit hvað framtíðin á eftir að bera í skauti sér ;)
Hvaða konu úr Mý deild viltu kynnast í næsta fréttabréfi? Erlu Guðmundsdóttur
Hvaða spurningu viltu leggja fyrir Erlu? Hvaða hrekk ert þú stoltust af að hafa tekið þátt í?
